Ciidanka Xoogga Dalka ayaa howlgalo qorsheysan oo ay ka fuliyeen deegaanno ka mid ah Gobalka Shabelaha Hoose ku soo qabtay tiro ka mid ah dhagarqabayaasha Al-Shabaab, isla markaana gubay xarun ay maleeshiyada Al-Shabaab ku lahayd deegaanadaas.
Deegaanada ciidamada howlgallada ka fuliyeen ayaa kala ah Aliyow Baarow, Doonka Aw guudle, Buusleey, Galooy, Xarbiga, Warta Mursal, Bulo ay Famey iyo deegaanno kale, halkaasi oo ay argagixisada dhibaatooyin ku hayaeen shacabka deegaannadaas, waxaana ciidamada ay si rasmi ah ula wareegeen deegaannada ay howlgallada ka fuliyeen.
Taliye Cabdullahi Mustafa Cali Madaale Qaran oo hogaaminayay howlgalka, uuna ku wehlinayo Taliyaha ururka 64aad qeybta 60aad ee ciidanka xoogga dalka Cali Cabdullaahi (Xalac) ayaa sheegay in ciidamada ay gacanta ku dhigeen lix ka tirsan maleeshiyada Al-Shabaab, kuwaasi oo qaarkood lagu qabtay qoryaha fudud ee sida AK47, lana gubay goob ay dadka ku xiri jireen, waxaana ay ciidamada sii daayeen dadkii ay dhagarqabaayasha maxaabiis ahaan u heysteen.
Taliyaha ayaa sheegay in ciidamada ay diyaar uyihiin in ay difaacaan dalkooda, dadkooda iyo Diintooda, isla markaana aysan ka daali doonin howlgallada ka dhanka ah Al-Shabaab ilaa cadowga laga xoreynayo deegaaannada ay kaga suganyihiin qaar ka mid ah Gobollada dalka.
