Ciidanka Xoogga dalka Soomaaliya ayaa howlgalo amni xaqiijin ah ka sameeyay magaalada Galcad ee gobalka Galgaduud iyo deegaanno hoos taga oo qiyaastii baaxad ahaan gaaraya ku dhowaad 30-KM.
Ciidamada ayaa si gaar ah hawlgal amni xaqiijin ah uga sameeyay dhamaan qaybaha ay ka koobantahay magaalada Galcad iyo xaafadaheeda.
Dhammaan deegaannada hoos taga Galcad oo geesiyaasha Xoogga Dalka ay howlgalada ay sameeyeen ayaa Khawaarijtu ay isaga carareen, sida saraakiisha ay u sheegeen Warbaahinta Qaranka.
Saraakiisha Ciidanka Xoogga Dalka ayaa dadka shacabka ah kula kulmay deegaannada howlgalada laga sameeyay, iyadoo saraakiisha ay dad-weynaha ka xog-waraysteen dhibaatooyinka ay khawaarijta ku haayeen.
Howlgalkaan ayaa qayb ka ah howlgalo maalmahaan ka socday qaybo badan oo ka mid ah gobalka Galgaduud, kaas oo Khawaarijta looga saaray dhul baaxad ahaan gaaraya ku dhowaad 100-KM.
