Cutubyo ka tirsan ciidanka Boliiska dowlad goboleedka Hirshabeelle oo gaaraya illaa 50 askari oo iskugu jira rag iyo dumar ayaa maanta gaaray magaalada Buulo-burde ee gobolka Hiiraan.
Dufcadaan oo dhawaan tababar loogu soo xiray dugsiga Tababarka Boliiska Hirshabeelle ee Jowhar, ahna dufcadii labaad ayaa waxaa garoonka diyaaradaha Buulo-burde ku soo dhaweeyay maamulka dagmada buulo-burde iyo saraakiil ka tirsan Ciidanka Boliiska degmada.
Taliyaha Ciidanka Boliiska Buulo-burde Cabdi Maxamed Cali ayaa sheegay in ciidankaan ay wax badan ka bedeli doonaan ammaanka degmada iyo u adeegida bulshada.
Kusimaha guddoomiyaha degmada Liibaan Cabdi Burusow iyo guddoomiyaha dhanka amniga mudane Cismaan Geedi Cilmi ayaa ciidamada kula dardaarmay in si wanaagsan ay ugu adeegaan bulshada ayna gacan bir ah ku qabtaan waxyaabaha lidiga ku ah amniga.
