Maleeshiyaadka Al-Shabaab ayaa bilaabay inay isaga cararaan Degmooyinka Kuntuwaareey iyo Sablaale kadib markii ciidanka xoogga dalka ay halkaasi ka bilaabeen dhaq dhaqaaqyo ciidan, kuwaasi oo ujeedkoodu yahay sidii argagixisada looga saari lahaa guud ahaan gobolka Shabeelaha Hoose.
Ciidanka xoogga dalka ayaa nawaaxiga Degmooyinka Kuntuwaareey iyo Sablaale ka bilaabay howlgallo lagu baacsanayo haraadiga Maleeshiyaadka Al-Shabaab, kuwaasi oo inta badan haatan faarujiyay degmoyinkaasi sida uu Idaacadda Ciidamadda Qalabka Sida u sheegay Sareeyo Guuto Cabdixamiid Maxamed Dirir Taliyaha Ciidanka Dhulka Xoogga Dalka Soomaaliyeed oo ku sugan degaanka Janaale oo dhawaan laga saaray argagixisada Al-Shabaab.
Taliyaha ayaa sheegay maleeshiyaadkii ka cararay Kuntuwaareey iyo Sablaale inay gaareen Gobolka Jubada dhexe isla markaana ay uga daba tagi doonaan meelkasta oo ay ku dhuumaaleystaan.
Ciidanka Xoogga dalka oo kordhiyay howlgallada ka dhanka ah maleeshiyada Al-Shabaab ayaa dhowaan ka saaray deegaanka Janaale oo ka mid ah meelaha ugu muhiimsan ee Gobolka Shabeelaha Hoose.
