Ciidamada Xoogga Dalka Soomaaliyeedc oo howl-gallo lagu baacsanayo maleeyshiyaadka Nabad-diidka Al-Shabaab ka wada degaanno ka tirsan Shabeelladda dhexe ayaa la wareegay Tuulada Geelgub oo qiyaastii 10 km u jirta Degmada Cadale ee Gobolka Shabellada Dhexe.
Howgalladani oo ah kuwa lagu sugayo ammaanka deegannadaasi ayaa waxaa hoggaaminaya Taliye ku xigeenka Ciidamada xoogga Dalka Soomaaliyeed, Sarreeye guuto; Maxamed Cali Bariise.
Degaannada laga eryay Nabad-diidka ayaa Al-Shabaab u ahaa goobo muhiim u ah oo ay kasoo maleegi jireen weearrada ay kusoo qaadaan deegaanka Geelgub, waxaana haatan soconaya howlgallo miino baaris ah oo lagu xaqiijinayo ammaanka guud ee degaanka.
Dadka Shacabka ah ee ku dhaqan deegaannada laga xoreeyay Nabad-diidka ayaa aad u soo dhoweeyay tallaabooyinka ay ciidanku ka qaadeen kooxda Al-Shabaab, kuwaas oo dhibaato ba’an ku hayay Dadka halkaasi ku nool.
