Kulan geba-gebo u ah tartanka ciyaaraha degmooyinka gobolka Benaadir ayaa caawa ka socda garoonka Ingineer Yariisoow ee magaalada Muqdisho.
Kulankaan oo mudaba la sugayay ayaa waxaa ku baratamaya tartamayaasha degmooyinka Dharkiinleey iyo Waaberi ee gobolka Benaadir.
Wasiirka dhalinyarada iyo ciyaaraha xukuumadda Soomaaliya Marwo Khadiijo Maxamed Diiriye, guddoomiyaha gobolka Benaadir ahna Duqa Caasimada Muqdisho mudane Cumar Maxamed Maxamuud {Filish}, guddoomiyaasha degmooyinka baratamaya, mas’uuliyiin kale oo dowladda ka tirsan kumanaan shacabka caasimada ah ayaa ka mida daawadayaasha garoonka ku sugan ee kulankaan xiisaha badan.
Ciyaarta ayaa hadda loo gudbay wareegeeda labaad, mana jirto ilaa iyo hada cid ay u suurta gashay fursad ay Gool ku dhaliyaan.
Degmada Dharkiinleey ayaa fursado badneyd marka loo fiiriyo qaab ciyaareedka ay garoonka la yimaadeen qeybta hore ee ciyaarta.
Ciyaartooyda degmada Waaberi ayaa difaacanaya koobka degmooyinka gobolka Benaadir, oo ay si xiriir ah ugu guuleysteen labadii sano ee lasoo dhaafay, halka tartamayaasha degmada dharkiinleey iyaguna difaacanayaan fursad cajiib oo ay tartankaan ku heleen, taasi oo ah in aan shabaqooda Gool laga dhalin mudadii uu kulankaani socday.
Waa ciyaar adag oo aan sahal lagu saadaalin Karin balse natiijadda ayaa la ogaan doona waqti dhow kadib.
