Shan ruux ayaa ugu geeriyootay 18-kalena waa ay la ildaranyihiin xanuunka shuban biyoodka oo ka dilaacay degmada Jalalaqsi ee gobolka Hiiraan.
Guddoomiyaha Degmada Jalalaqsi ee gobolka Hiiraan Maxamuud Cabdulle Fiidow oo la hadlay Radio Muqdisho ayaa sheegay in uu isa soo tarayo dadka uu soo ridanayo cudurka shuban biyoodka ah, isagoo intaa ku daray inaysan jirin adeegyo caafimaad oo ku filan dadka uu saameeyay cudurka, maadaama goobaha caafimaadka aysan xamili karin qul qulka dadka uu soo ridanayo cudurka.
Guddoomiye Fiidow ayaa sheegay in shacabka ku nool degmada Jalalaqsi iyo tuulooyinka ku xeeran in markii hore ay saameyn ku yeelatay abaaraha ka jirta qeybo ka mid ah gobolka Hiiraan, haatana ay uga sii dartay cudurka shuban biyoodka oo ka dilaacay degmada, taasi oo uu ku sheegay inay ka dhalatay biyaha wabiga oo wasaqsan, isla markaana ay dadku cabeen biyahaasi.
Guddoomiyaha Degmada Jalalaqsi ee gobolka Hiiraan ayaa ugu baaqay dowladda Federaalka iyo hay’adaha samafalka inay gurmad dhan waliba leh ay la soo gaaraan bulshada ku nool Jalalaqsi, si wax loogu qabto bukaanada uu soo ritay cudurka shuban biyoodka.
