Tartanka Kubada cagta ah degmooyinka gobalka Banaadir oo si habsami leh uga socda garoonka kubadda cagta ee Banaadur Stadium ee degmada C/casiis ayaa waxaa galabta cayaar wanaagsan dhexmartay cayaartooy ka kala socotay degmooyinka Kaxda, Deyniile, Xamarweyne iyo Waaberi.
Garoonka oo lagu cayaaray labo kulan ayaa kulanka hore waxa uu dhexmaray cayaartooyda degmooyinka Kaxda iyo Deyniile, kuwaasi oo soo bandigay cayaar wanaag ay jecleysteen dhamaantii intii u soo daawasho tegtay, waxaana guud ahaan cayaarta ay ku soo idlaatay 1-0 oo ay guusha ku raacday cayaartooda degmada Kaxda.
Kulanka xiga ayaa waxa uu dhexmaray cayaartooyda degmooyinka Waaberi iyo Xamarweyne, kuwaasi oo iyana dhankooda la yimid kubad aad u wanaagsan, waxaana guud ahaan ay ku soo idlaatay bar bar dhac 1-1 oo ay ku kala baxeen cayaartooyda labada degmo.
Labada degmo ayaa sanadkii la soo dhaafay waxa ay isku arkeen finalka tartanka degmooyinka oo ay xilligaasi ku guuleysatay cayaartooyda degmada Xamarweyne, balse kulankii maanta ayaa ku soo idlaatay bar baro.
Sawir Qaade:-Farxaan Suleymaan Daahir
