Allaha u naxariistee Guddoomiye waaxeedkii Halgan ee degmada Deyniile Marxuum Cabdiqaadir Fooldibi oo Maamulka degmada ay sheegeen in ay dishay xaaskiisa ayaa lugu aasay magaalada Muqdisho.
Allaha u naxariistee Marxuum Cabdiqaadir waxaa saaka dishay xaaskiisa labaad kaddib markii ay ugu tegtay guriga kale ee ay xaaskiisa koowaad joogtay sida ay Warbaahinta u xaqiijiyeen ehelada Marxuumka oo sheegay in xaaska dishay ay hadda u heysay hal canug, ayna leedahay uur.
Guddoomiye ku-xigeenka Amniga ee Degmada Deyniile Cabdiqaadir Cali Faracadde ayaa sheegay inay ku howlanyihin sidii ay gacanta ugu soo dhigi lahaayeen xaaska falka dilka ah geysatay.
“Dhacdadan saaka halkii saac ayay dhacday, waxaana dilkaas geysatay xaaska Cabdiqaadir labada reer mid ka mid ah, dhaawac ayuu noqday, dhaawacii waxaa loo qaaday Isbitaal digfeer, dhaawaca ayuuna ugu dhintay halkaas, kan maamul ahaan qeyb isbitaalka ayaan ugu tegnay, qeybta kalena waxa ay soo aadeen halka uu falka ka dhacay, dhanka kale xaaska wey fakatay laakiin ciidamada amniga waxa ay hayaan raad fiican waana ku daba joognaa inaan gacanta ku soo dhigno”.ayuu yiri Cabdiqaadir.
Allaha u naxariistee Marxuum Cabdiqaadir ayaa lagu aasay degmada Deyniile ee gobolka Benaadir.
Halkan ka Daawo Muuqaalka oo dhameystiran
https://www.facebook.com/sntvnews/videos/654187085431954/
