Dagaal u dhaxeeya Maleeshiyada Al-Shabaab iyo Dadka degaanka ayaa ka dhacay Tuulada Caad oo hoos timaadda Degmada Xarardheere ee Gobolka Mudug.
Maleeshiyada Al-Shabaab ayaa xalay laga saary degaanka, ka dib dagaal culus oo ay ku qaadeen Dadka degaanku, balse saaka ayay mar kale Maleeshiyadu soo weerareen halkaas, iyagoo doonaya inay Dadka si xoog ah Lacago kaga qaadaan.
Dad ku sugan Tuulada Camaara oo u dhow degaanka Caad ayaa warbaahinta Qaranka u sheegay in halkaasi ay weli ka taagan tahay xaalad dagaal , waxay ka dalbadeen maamulka Galmudug inuu Shacabka ku Gacan siiyo dagaalka ay kula jiraan Kooxda Al-Shabaab.
Dhowr jeer oo hore ayay Dadka degaanka iyo Al-shabaab ku dagaallameen Tuulooyin hoos yimaada Degmada Xarardheere, markii ay Dadka degaanka diideen dhac barer ah oo ay Al-Shabaab kula kaceen iyo inay Askareeyaan Carruurtooda.
