Wasiirka Gaadiidka, Cirka iyo Dhulka ee Dowlad goboleedka Koonfur Galbeed Soomaaliya mudane Xasan Xuseen Maxamed iyo ganacsatada magaalada Xudur ayaa deeq xoolo oo ay ku dhiira gelinayaan ciidamada guutada 9-aad oo guulo lataaban karo ka keenay howlgalkii ay ku galbinayeen baabuurtii ganacsiga ee Xuddur soo gaaray ku wareejiyey Taliyaha guutada 9aad ciidanka xooga dalka ee gobolka bakool Cali Ibraahim Habad.
Lixda neef geela ah ee lagu wareejiyay ciidamada saddex ka mid ah oo uu bixiyey Wasiir Xasan Xuseen Maxamed waxaa wakiil uga ahaa Maareeye ku-xigeenka garoonka diyaaradaha Degmada Xudur Saalax Xasan Maxamuud.
Guddoomiyaha ganacsatada Degmada Xudur Hirow Sanweyne ayaa sheegey in ciidamada ay ka mudanyihiin dhiiragelin intaa ka badan.
Taliyaha guutada 9aad qeybta 60 aad ciidanka xooga dalka ee Gobolka Bakool Cali Ibraahim Habad ayaa maamulka koonfur Galbeed iyo ganacsatada uga mahadceliyey geela ay ku wareejiyeen.
Agaasimaha Madaxtooyada dowlad goboleedka Koonfur Galbeed Cabdulaahi Cali Watiin ayaa ciidamada iyo bulshada ku bogaadiyey in ay u midoobaan ladagaallanka argagixisada Al-Shabaab, si looga cirib tiro guud ahaan deegaannada Gobolka Bakool.
