Dhallinyaro isxilqaantay ayaa maanta ka qeybiyay magaalada Jowhar ee Caasimadda Hirshabeele agab looga hortagayo faafidda cudurka COVID-19 oo ah cudur dunidaan dhibaato badan ku haya.
Dhallinyaradaan ayaa agabka af xirka (Face Mask) ku wareejiyay koox ka shaqeeysa nadaafadda xaafadda Horseed oo ka mid ah afarta xaafadood ee magaalada, waxaana goob joog ka ahaa Guddoomiyaha Xaafadda Horseed.
Xasan Suleeymaan iyo Shariif Axmed Calasow oo hormuud u ahaa dhallinyarada isxilqaantay ayaa waxay bulshada ku wacyigeliyeen in nadaafaddu ay ka mid tahay waxyaabaha looga hortagayo faafidda COVID-19, waxayna shacabka ka codsadeen in la qaato tallooyinka dhakhaatiirta iyo mas’uuliyiinta ku shaqada leh ka hortagga faafidda COVID-19.
Faadumo Cali Nuur oo ka mid ahayd shaqaalaha nadaafadda ayaa ka mahadcelisay agabka af xirashada ah ee ay dhallinyarada u keeneen.
Guddoomiyaha Xaafadda Horeed Cabdikariim Xaamud Xasan ayaa boogaadiyay dhallinyarada isxilqaantay iyo hawsha ay bulshada u hayaan, isagoo shacabka ka codsaday in lagu dadaallo sidii looga hortagi lahaa cudurka COVID-19.
