Dhalinyaro ka badan 100 qof oo tan iyo sanadkii 2011-ka ku xirnaa dalka India, loona heysto burcad badeednimo ayaa lagu soo waramayaa inay ku jiraan xaalado nolol xumo, kuwaasi oo qaarkood lagu wado in maanta la maxkamadeeyo.
Sacdiyo Maxamuud Xuseen oo la dhalatay mid ka mid ah wiilasha Maxkamadda la soo saaro maanta, isla markaana la hadashay laanta Afka Soomaaliga ee VOA ayaa sheegtay in tan iyo 2011-kii ay ku xiranyihiin xabsiyo ku yaala dalka India, waxaana ay codsaday in dowladda ay gacan ka geysato sii deynta dhallinyaradan oo tiradoodu gaareyso 119-qof.
Sacidyo ayaa tilmaamtay in ay xiriir la sameeyeen mas’uuliyiinta safaaradda Soomaaliya ee India, balse aysan ka helin jawaab ku filan, waxaana ay madaxda sare ee dowladda ka codsaday in la sii daayo dhallinyarada Soomaaliyeed ee ku jira xabsiyada dalka India ee loo heysto falalka burcad badeednimada ah.
“Wiilasha intoo badan waqti kala duwan ayaa la soo qabtay, walaalkeyga waxaa uu ku jiraa meel gaar ah oo xabsiga ka mid ah, waxaana haya cudurka TB-da, taasi oo ka dhalatay baahida xabsiga uu kula jiray, waxaan codsaneynaa in dhallinyarada la soo badbaadiyo, walaalkeyga waxa uu ka midyahay maanta kuwa la maxkameynayo, haddii uu waayo garab, dib ayay u dhaceysa maxkamadeyntiisa” ayay tiri Sacdiyo.
