Maamulka Degmada Dhuusamareeb ee Caasimada Galmudug ayaa dhagax dhigey barnaamijka Olole Dadwayne oo wax looga qabanayo billicda Magaalada iyo wadooyinka ku waxyeeloobey daadadkii ka dhashey roobkii Guga ee ka da’ay Caasimada iyo nawaaxigeeda.
Guddoomiyaha Maagaalada Dhuusamareeb oo ay Wehliyaan xubno maamulkiisa ka tirsan iyo Mas’uuliyiin kale ayaa wadajir u dhagax dhigey dhismaha wadada Jaah oo isku xiri doonta xaafadaha Dayax iyo Hodan ee Magaalada Dhuusamareeb taa oo si is xil-qaan ah ay ku dhisayaan bulshada xaafadahaasi degan, Waxaana abaabulkan uu yahay mid xal loogu raadinayo burburka xoogan ee ka muuqda wadooyinka halbowlaha ah ee saameynta ku yeeshay isku socodka dadka iyo gaadiidka isaga kala gooshaya Shanta xaafadood ee Magaalada Dhuusamareeb.
Guddoomiyaha xaafada Dayax Axmed Saciid iyo qaar ka mid ah abaabulayaasha Ololahan lagu hagaajinayo wadooyinka ayaa sheegay in dhismaha wadooyinkaan ay muhiim utahay bulshada xaafadahaas degan.
Guddoomiyaha magaalada Dhuusamareeb ahna duqa Caasimada Macalin Cabdiraxmaan Geedaqoroow ayaa ugu dambeyn ku amaaney Dhallinyarada iyo guddiyadda xaafadaha dhaqaajinta howshan bilaawga ah, isagoo xusey in Caasimadu u baahan tahay isbadal dhinac walba ah.
