Dibad baxayaal aad u badan oo kor u dhaafayay kumanaan ayaa xalay isugu soo baxay aqalka looga arimiyo magalada Columbus Ohio, kuwaas oo ku qeylinayay ereyo ka dhan ah go’aamo uu dhawaan soo saaray Madaxweyne Trump .
Iyada oo cimiladu aad u xumayd uuna jiray qaboow aad u daran, hadana dadku saacad walba waa ay sii kordhayeen ilaa ay goobtu soo buux dhaaftay.
Dibad baxayaasha oo ka kala socday qeybaha kala duwan ee bulshadda Mareykanka ku nool ayaa waxa ay lulayeen boorar iyo halku dhigyo muujinaya sida ay uga soo horjeedaan in Mareykanka laga mamnuuco soo galootiga, in la bar tilmaameedsado dalalka qaar, in diimaha qaar loo arko kuwo lidi ku ah ammaanka Mareykanka iyo in darbi laga dhiso xaduudda Mexico ay la wadaagto Mareykanka.
Halku dhiggyada ay wateen waxaa ka mid ahaa. Mareykan waa dhulkii soo galootiga, Darbi Maya, Xayiraad Maya, Qaxootiga waan ku soo dhaweynaynaa dalkeena, Nacayb maya, Kala sooc maya, Midnimo Haa. Qooysaska hakala geeyn, Awoodda dadkaa iska leh iyo kuwo kale oo badan.
Mudo markii ay joogeen barxada weyn ee aqalka looga arimiyo Columbus waxa ay u dareereen Maxkamada gobolka oo ay iyana horteeda taagnaayeen in cabaar ah.
Waxaa cariiri noqday in gaadiidku ay isticmaalaan waddooyinkta bartamaha Columbus, maadama kumanaan dad weynaha ah ay wadooyinka socod ku marayeen.
Ciidanka booliska ayaa aad ammaanka u sugayay iskuna dayay in xaaladda ammaan aysan wax saamayn ah ku yeelan dibadbaxyadani.
Inkasta oo ay Soomaali dhallinyaro u badan ka soo qeyb galeen hadana wey adkeyd in ay Soomaalidu si fudud iskugu arkaan goobta banaanbaxa maxaa yeelay waxa qariyay tirada dadka kale oo marka loo eego Soomaalidu ay noqonayaan tiro aan la sheegi karin.
Banaanbaxan oo qeyb ka ah banaanbaxyo hareeyay Mareyanka tan iyo markii la doortay Madaxweynaha cusub ee dalka Mareykanka Donald Trump waxa ay muujinayaan sida dalka Mareykanka uu u yahay dalkii soo galootiga.
Lama oga inta ay sii socon doonaan banaanbaxyadani waloow ay jiraan dad aaminsan in la sii wado inta laga helayo isbadal markale uu ku dhawaaqo Madaxweyne Trump.
Bashiir Taajir & Deeqo SONNA
