Dowladda Soomaaliya ayaa wadda dadaallo ay ku soo daad gureyneyso Qaxootiga Soomaaliyeed ee Yemen ku xaniban, iyadoo saaka lagu wado inay Muqdisho soo gaaraan.
Diyaaradaan ayaa la filayaa iney magaalada Muqdisho keento Qaxooti Soomaaliyeed oo gaaraya 145-ruux, kuwaasi oo la sheegay inay yihiin dad liito oo aanan awoodin inay badda soo maraan.
Qunsul ku-xigeenka Soomaaliya ee Yemen Xuseen Xaaji, ayaa sheegay in Diyaaradan ay soo qaadeyso dadkaasi, wuxuuna tilmaamay in magaalada Muqdisho la keenayo oo Dowladda Soomaaliya iyo guddiga samata bixinta Qaxootiga Soomaaliyeed ee Yemen ay ku soo dhaweynayaan garoonka Muqdisho.
Xuseen ayaa tilmaamay Dowladda oo kaashanaysa Hay’adda IOM inay suuragal ka dhigtay in dadkaan lasoo qaado, waxaana dhanka kale uu sheegay in maanta waqti dheeraad ah oo xabad joojin ah Yemen ay ka dhaqangalayso.
Afhayeenka Xukuumadda Ridwaan Xaaji Cabdi Wali, ayaa Khamiistii sheegay in maanta oo Isniin ah Muqdisho Dowladda ay keenayso 145-ruux oo Qaxooti Soomaali ah, kadib markii Dowladda ay arintaasi dadaal dheeri ah ku bixisay.
Guddiga badbaadinta Qaxootiga Soomaaliyeed oo xalay kulan loogu gurmanayo Qaxootiga ku qabtay xarunta Warbaahinta Qaranka ayaa tilmaamay in ay wadaan dadaallo ku aadan sidii dib u dajin loogu sameyn lahaa qaxootiga ka soo laabanaya Yemen.
