Siminaar lagu baranayay saameynta gargaarka dibadda laga keeno uu ku yeeshay kobaca dhaqaalaha dalka iyo sida looga gaashaaman lahaa, oo uu soo qaban qaabiyay Maamulka Jaamacadda Somaville, isla markaana ay ka faa’iideysteen qaar ka mid ah ardayda Jaamacadda ayaa lagu qabtay magaalada muqdisho
Siminaarka ayaa waxaa ka qeyb galay Maamulka Jaamacadda Somaville Ardayda Jaamacadda, Aqoonyahanno waxaana casharo la xiriira saameynta ay ku yeelatay gar gaarka dibadda laga keeno dhaqaalaha dalka Soomaaliya ka bixinayay Prof Yaxye Caamir Xaaji Ibraahim oo ka mid ah aqoonyahanada Soomaaliyeed, waxaana inta uu siminaarka socday looga dooday dhibaatooyinka iyo caqabaha uu ku leeyahay gargaarka dalka dibadiisa laga keeno iyo siada looga maarmi karo
Gudoomiye ku-xigeenka Jaamacadda Somaville Prof Cabdulqaadir Bashiir Maxamed ayaa soo jeediyay in laga shaqeeyo sidii sare loogu qaadi lahaa wax soo saarka ilaha dhaqaalaha dalka.
Prof Yaxye Caamir ayaa tilmaamay in bulshada lagu dhiiri geliyo tabcashada beerahooda iyo horumarinta kaabayaasha dhaqaalaha dalka, si loo gaaro isku tiirsanaan.
Guddoomiyaha Jaamacadda Somaville Dr Cabdinuur Sheekh Axmed Caraaye oo ka hadlay muhiimadda siminaarkan ayaa xusay in ay ahayd dhiiri gelinta wax soo saarka dalka, ayna ku talinayaan in dhiiri gelinayo ganacsatada Soomaaliyeed ee hal abuurka leh iyo kuwa kale doonaya inay horumariyaan wax soo saarka dalkeena.
