Wasaaradda arrimaha gudaha iyo dib u-heshiisiinta dowlad goboleedka Galmudug ayaa shaacisay liiska xildhibaannada golaha deegaanka Degmada Dhuusamareeb ee caasimada Galmudug, kadib doorashadii ka dhacaday magaalada, taas oo lagu soo doortay xubnaha kamid noqonaya golaha degmada Dhuusamareeb.
Maalinimadii Isniinta aheyd ayaa bulshada Dhuusamareeb waxaa ay u dareertay doorashada golaha, kuwaas oo ka kooban 33 xubnood, waxaana maalintii koowaad lasoo doortay 15, xubnood, halka 18 xubnood oo kale dib looga kale doortay maalmihii xigay, waxaana wadartay xildhibaannadu tahay 33 mudane.
Golaha deegaanka Dhuusamareeb oo ah xildhibaanadii ugu horeeyay ee heer deegaan ay yeelato Dhuusamareeb ayaa maanta ladhaariyay, iyadoo ay munaasabada goob-joog ka ahaayeen wasiirka arrimaha gudaha Galmudug, gudiga doorashooyinka dowladaha hoose iyo Agaasimaha guud ee wasaaradda arrimaha gudaha Galmudug.
Wasiirka arrimaha gudaha Galmudug Cabdi-waayeel oo la dardaarmay Xildhibaanada Gollaha Deegaanka Dhuusamareeb ee la dhaariyey, ayaa shaaciyay in maalinta barito ah la qabanayo doorashada gudoomiyaha iyo kuxigeenka oo ay xubnaha goluhu Iska dhex dooran doonaan.
Hannaankaan lagu soo doortay golaha deegaanka Dhuusamareeb ayaa waxaa waday wasaaradda arrimaha gudaha iyo dib u heshiisiinta Galmudug, waxaana dhowaan lagu wadaa in doorasho nuucaan ay ka dhacdo degmooyin kale oo ka tirsan gobollada Mudug iyo Galgaduud sida Guriceel oo hoostaga maamul Goboleedka Galmudug ee Soomaaliya.
