Hay’adda Cilmi Baarista Puntland ee PDRC ayaa maanta Gaalkacyo ku qabatay kulan aqoon isweydaarsi ah oo u dhaxeeya suxufiyiinta ka howlgala Waqooyiga iyo Koonfurta magaalada Gaalkacyo ee gobolkaasi Mudug.
Kulankan aqoon-isweydaarsiga oo ay ka qayb galeen ku dhawaad 50 saxafi ayaa waxaa lugu baranayay doorka ay suxufiyiintu ku leeyihiin nabadda iyo qaab tabinta xiliyada ay jiraan colaadaha iyo isku dhacyada siyaasadeed ee maamulada dalka ka jira.
Gudoomiyaha Gobalka Mudug ee Galmudug Aways Cali Saciid oo furay aqoon isweydaarisaga ay suxufiyiinta gobalka Mudug ku yeesheen koonfurta Gaalkacyo ayaa sheegay in ka maamul ahaan diyaar u yihiin ka shaqaynta Nabadda, balse Wariyaashu iska dhaafan ku dhaqanka qabyaaladda.
Mudane Aways ayaa aad ugu dheeraday intuu Khudbada ku guda jiray Faa’iidada ay Nabaddu leedahay iyo reer Gaalkacyo Colaadihii ay so mareen, isagoo bogaadiyay in laga wada shaqeeyo isdhexgalka bulshada iyo Nabadgelyada.
Cabdiqaadir Warsame oo ka mid ahaa mas’uuliyiinta aqoon isweydaarsiga ka hadlay ayaa aad ugu dheeraday astaamaha lugu garto saxafiga wanaagsan, qaabka loo tabiyo xiliyada isku dhaca siyaasadeed iyo colaaduhu ay jiraan, isagoo bahda saxaafadda ka codsaday inay xoogga saaraan isdhexgalka bulshada.
Buraan Axmed Daahir Madax Hay’adda Cilmi Baarista Puntland ee PDRC, kana mid ah Saxafiyiinta rug caadayaasha ah ee dalka ku nool ayaa Saxaaafada kula dar daarmay inay kala saaran qabyaalada iyo shaqada ay bulshada u hayaan, door muhiim ahna ka qaatan Nabadda.
Burhaan ayaa sidoo kale sheegay in xiligii Nabadaynta Gaalkacyo & Saxaafaddu laf dhabar u ahayd heshiiskii Gaalkacyo lagu wada dagay, waxaana uu sheegay in maanta oo magaaladu kasii muhiimsantahay intii hore in dadku aysan Nabadda ka wada shaqaynayn qolo walbana dhankeeda Isbaaro qalbiga ah ay u aamintay.
Maxamed Jaamac
