Wasiirka Dowladda Britain u qaabilsan Qaaradda Afrika James Duddridge ayaa cambaareeyay weerarkii maanta kooxda argagixisada Al-Shabaab ay ku qaaday Hotelka Saxafi ee magaalada Muqdisho.
“Waxaan cambaareynayaa weerarkii Hotel Saxafi ee ay Shabaabku ka dambeeyeen, taasi oo sababtay dhimashada dad rayid ah iyo dhaawac dad kale, waxaan ehelada uga tacsiyadeynayaa dadkii weerarkaasi ku nafwaayay, weerarkan waxa ay markale ka turjumeysaa sida argagixisada Al-Shabaab ay u bartilmaameedsanayaan dadka rayidka ah” ayuu yiri Mr Duddridge
“Waxaan bogaadinayaa sida ciidamada amniga Qaranka ee dowladda Soomaaliya uga jawaabeen weerarkii argagixisadu ku qaadeen Hotelka Saxafi, isla markaana ay ku guuleysteen xaqiijinta amniga Hotelka” ayuu hadalkiisa ku daray Wasiirka.
Wasiirka Dowladda Britain u qaabilsan Qaaradda Afrika James Duddridge ayaa hoosta ka xariiqay in Britain ay mar waliba garab taagantahay shacabka iyo dowladda Soomaaliya, si guud ahaan dalka loogu soo dabaalo xasilooni iyo amni waarta.
