Dhaqaalahan oo loogu talo galay dadka ay saameeyeen abaaraha ee ku nool deegaanada Soomaaliland ayaa gaaraya hal milyan oo doolar, taasi oo ka timid madaxda iyo shaqaalaha dowladda Soomaaliya oo lacagta iska soo aruurriyey, waxaana lagu wareejiyey guddiga gurmadka abaaraha dalka oo isla maantaba u amba baxay magaalada Hargeysa si deeqdan ay u wareejiyaan.
Ra’iisul wasaare ku-xigeenka Xukuumadda Federaalka ah ee Soomaaliya mudane Maxamed Cumar Carta oo garoonka Muqdisho kulan kula qaatay xubnaha guddiga oo qeyb ay ka ahaayeen Wasiiro ka tirsan Xukuumadda ayaa sheegay in dhaqaalahan oo horudhac ah kaalin ay ka qaadan doonaan yareynta baaxada abaaraha ka jirta gobollo kamid ah Soomaaliland.
“Waa lacag hor dhac ah oo aanu ugu talo galnay inaan gaarsiino dadka ay abaaraha saameeyeen ee ku nool deegaanno ka tirsan Soomaaliland, oo ay ka jiraan biyo yari iyo cunto la’aan, taasi oo ay iska gooyeen madaxda dowladda iyo shaqaalaha,” ayuu yiri Mudane Maxa,ed Cumar Carta.
Ra’iisul wasaare ku-xigeenka dalka mudane Maxamed Cumar Carta ayaa sheegay in tallaabadan ay tahay mid Allah loogu dhawaanayo oo lagu badbaadinayo dad ay isku biirsadeen biyo yari iyo cuno la’aan:”ayuu hadalkiisa ku daray.
Ugu dambeyn madaxda Soomaaliland ayuu ku amaanay doorka ay ka qaadanayaan ka hortaga abaaraha iyo badbaadinta dadka ay saameeyeen abaarahaasi.
“Madaxda Soomaaliland waxaan ku bogaadinayaa in ay joojiyeen doorashooyinka oo ay u jiheysteen ka qeyb qaadashada dadaallada abaaraha looga hortagayo” ayuu hadalkiisa ku daray Mudane Maxamed Cumar Carte.
