Wasiirada Cadaaladda iyo Amniga Gudaha ayaa shaaciyay in gacanta lagu soo dhigay askartii ka dambeysay falal dil ah oo ka dhacay Muqdisho 24kii saac ee la soo dhaafay.
“Waxaan Shacabka Soomaaliyeed la wadaagayaa in ciidamada ammaanka ay gacanta ku dhigeen dadkii lagu tuhunsanaa iney geeysteen dilkii walaalaheena Sakariye Maxamuud Xuseen iyo Sowdo Maxamuud Xuseen.
Sidoo kale waxaa gacanta lagu soo dhigey qofkii dhibka u geystey walaalkeena
Mahad Cabdulraxmaam Maxamuud, Dhamaan eedeysanaasha cadaaladda ayaa la hor geynayaa Insha Allah”. Ayuu yiri Wasiirka Cadaaladda mudane Cabdiqaadir Maxmed Nuur.
Sidoo kale Wasiirka Amniga Gudaha Xukuumadda Federaalka Soomaaliya Mudane Maxamed Cabdullaahi Nuur ayaa Ummadda Soomaaliyeed uga tacsiyadeeyay geerida walaalihii xalay lagu dilay Muqdisho iyo dilkii caawa, isagoo intaa ku daray in sharciga la horgeyn doono Insha Allah.
“Allah ha u naxariisto walaalkeen Mahad Cabdiraxman oo u geeriyooday dhaawici soo gaaray caawa, Waxaan mar kale shacabka u xaqiijinayaa in ciidamada amnigu soo qabteen qofki ka danbeeyay falkaas waxaana la horgayn doonaa Cadaaladda”. Ayuu yiri Wasiirka Amniga.
