Duqa Degmada Gaalkacyo oo ay wehliyeen Agaasimayaal iyo xubno ka tirsan Golaha Deegaanka Degmada Gaalkacyo ayaa maanta ka qeyb qaatay ololaha sare u qaadista bilicda Magaalada, kaa oo sidoo kale ay si isxilqaan ah uga qeyb qaadanayaan Bulshada Reer Gaalkacyo.
Ololahan oo qeyb ka ah dadaalada uu maamulku waday ayaa la qorsheeyay in dhamaan xaafadaha magaalada si isku mid ah looga fuliyo si sare loogu qaado bilicda Magaalada Gaalkacyo.
Duqa Dagmada Gaalkacyo Mudane Cabdiraxmaan Sheekh Xasan Jimcaale oo la hadlay Warbaahinta ayaa sheegay in ololahan uu dabo socdo kuwii uu horay maamulku uga qaban jiray guud ahaan xaafadaha Magaalada, isagoo ugu baaqay dhamaan shacabku in ay kaalintooda ka qaataan, lana shaqeeyaan howlwadeenada Waaxda Arimaha Bulshada Dowladda Hoose ee Degmada Gaalkacyo.
Duqa Dagmada ayaa dhanka kale fariin u diray dadka caadeeystay in ay qashinka ku shubaan goobaha aan loogu tala galin, isagoo sheegay in ay ciqaab adag mudan doonto ciddii aan u hogaansamin awaamiirta maamulka degmada ee la xariirta arimaha Nadaafada iyo Sare u qaadista Bilicda Magaalada Gaalkacyo ee Xarunta Gobalka Mudug.
