Duqa Muqdisho ahna Guddoomiyaha Gobolka Banaadir Mudane Cabdiraxmaan Cumar Cusmaan (Eng.Yarisow) ayaa sheegay in 15kii bilood ee la soo dhaafay uu maamulka G/Banaadir si weyn u awoodsiiyey una dhiirigeliyey Dhalinyarada taasoo abuurtay kalsooni ay xirafahoodu ku soo bandhigaan.
Guddoomiyaha ayaa sheegay in awood-siinta dhalinyarada ay tahay furaha horumarka Caasimadda Muqdisho, isagoo xusay in maamulkiisu uu xoogga saarayo sidii dhalinyarada looga faa’iideysan lahaa xirafahooda.
“Dhalinyarada G/Banaadir ee ku tartamay barnaamijka aqoonta, Fanka, Suugaanta iyo Farshaxanka ee lagu soo bandhigey degmada Xamar-Jajab ayaa dhigay wacdaro soo jiitay bulshada jecel horumarka Caasimada Muqdisho, waxaana naga go’an in dhalinyarada aqoontooda laga faa’iideysto.
Guddoomiye ku-xigeenka Amniga iyo iyo Siyaasadda Maamulka Gobolka Banaadir Mudane Maxamed Cabdullahi Maxamed (Tuulax ) ayaa xiritaanka munaasabadda ka sheegay in tartamada noocaan oo kale ah la sii xoojin doono, si dhalinyarada hal-buurka leh loogu bandhigo bulshada.
Maamulka Gobolka Banaadir ayaa qaar kamid ah degmooyinka Caasimadda ka sameeyey tartamo lagu xoojinayo isdhexgalka bulshada, iyadoo ujeedku yahay in la helo bulsho isku xiran oo is-dhaafsata aqoonta ay is dheer yihiin.
