Mudane ka tirsan Barlamaanka oo ku sugan gobolka Bari ayaa faahfaahin ka bixiyay xaaladda deegaano ka tirsan gobolka oo dufaanno ay ku dhufteen.
Xildhibaan Cabdullaahi Maxamed Ciise oo la hadlay Radio Muqdisho isaga oo ku sugan deegaanka Baar-gaal ayaa sheegay in duufaan daadad wata ay ku dhacday deegaan lagu magacaabo Bariida, kaasi oo ay ku bur bureen hanti iyo xoolo intuba, waxaana uu xusay in deegaanka ay musiibadan ku habsatay ay xilligan ku jirto xaalad go’doon ah.
Xildhibaanka ayaa ugu baaqay Wasaaradda Arrimaha gudaha iyo Federaalka ee Xukuumadda Soomaaliya inay gurmad balaaran ay gaarsiiso deegaanna ay musiibadan ka dhacday eek a tirsan Gobolka Bari, waxaana uu tilmaamay inay jirto cabsi ku aadan in qasaaraha ay intaa ka badato.
Hay’adda maareynta macluumaadka biyaha iyo berriga Soomaaliya ee SWALIM ayaa shalay soo saartay digniin ku aaddan in qaybo ka mid ah gobolka Bari ay ku soo wajahantahay duufaan cusub.
