Duulimaadkii u horeeyay ee toos ah Muqdisho iyo Nairobi ayaa maanta oo Arbaco ah bilaaban doona, iyadoo dowladda Kenya ay si rasmi ah u bilaabi doonto dhaqan gelinta heshiiskii todobaadkii hore ay wada gaareen Madaxweyneyaasha Soomaaliya iyo Kenya.
Ra’iisul Wasaaraha Soomaaliya Mudane Xasan Cali Kheyre ayaa ka qeyb gelaya xafladda lagu daah farayo duulimaadka Muqdisho iyo Nairobi, iyadoo diyaaradii u horeysay oo toos ah ay saaka ka dhoofi doonto magaalada Muqdisho.
Wariyaha Warbaahinta Qaranka Nasro Bashiir Cali oo ku sugan garoonka diyaaradaha Caalamiga ah ee Aadan Cadde ayaa ku soo warantay in ay socoto qaban qaabada munaasadda ku aadan daah furka howlaha duulimaad tooska ah ee Muqdisho iyo Nairobi, iyadoo markii hore ay diyaaraduhu mari jireen garoonka Wajeer ee gobolka Waqooyi bari ee dalka Kenya.
Sidoo kale dhamaan diyaaradaha horay uga bixi jiray gobollda dalka ee aadi jiray Kenya ayaa bedelkii ay mari jireen Wajeer, wixii hadda ka dambeeya waxa ay soo mari doonaan magaalada Muqdisho ee Caasimada Soomaaliya, halkan oo si toos ah ay uga baxeyso duulimaadyada ku aadan Muqisho iyo Nairobi.
