Qaar ka mid ah Dhaawacyaddii la geeyey dalka Turkiga ayaa Xaaladooda caafimaad kasoo reyneysa, iyadoo lagu guuleystay qaliino lagu sameeyey qaar ka mid ah 35-ta bukaan ee la geeyey xarumaha caafimaadka ee Dalka Turkiga.
Dhawaacyada loo qaaday dalka Turkiga ayaa waxaa loo qeybiyey afar isbitaal oo ka mid ah isbitaaladda ugu wanaagsan ee dalka Turkiga , 22 qof waxaa la jiifiyay Polati Hospital , 3 qof oo carruur ah waxaa la dhigay Deshkapi Hospital, 8 qof Ankara Namune Hospital halka 2 qof la seexiyay Ataturk Hospital.
Xaalada 10-ka mid ah dhaawacyada loo qaaday Dalka Turkiga ayaa ku jira xaalad adag, qaarkood coma ayay ku jiraan, kuwaasi oo la ogoleyn in la booqdo, qaarna goobta baxnaanada AMA ee gargaarka gaarka ah ayaa la jiifiyay, kuwaasi lagu guuleystay qaliinadooda, isla markaana ah kuwa la wareysan karo.
Waxaa socdo dadaalo isdaba joog ah, qorsheyn iyo isbedelid bukaanada haddii loo arko in isbitaal kale lagu wareejiyo, si loo baxnaaniyo.
Agaasimaha Waaxda Caafimaadka guud ee Wasaaradda Caafimaadka Soomaaliya Dr. C/rixmaan C/llaahi Ibraahim oo warbixin ka dhageystay Dhaqaatiirka ayaa aad ugu ammaanay dowladda Turkiga Dadaalada ay ugu jirto sidii ay caafimaad deg deg ah u heli lahaayeen dadka Soomaaliyeed ee haatan ku jira Isbitaalada dalkaas,
Dr. C/rixmaan C/llaahi Ibraahim ayaa sidoo kale booqday qaar ka mid ah Bukaanadda isagoo si gaar ah u xog wareystay xaaladahooda iyo waxa ay haatan dareemayaan.
Wasaaradda caafimadka ee Soomaaliya ayadoo kaashanaysa safaaraddda Soomaaliya iyo guddiga ardayda waxaa qof waliba oo bukaan ah loo sameeyay qof u turjumo, maadaama ardayda Soomaaliyeed ee wax ka barta dalka Turkiga ay aqoon u leeyihiin luuqadda dalkaasi, taasi oo fududeyneysa in ehelada la socda dhaawacyada ay ku qancaan hanaanka loogu gurmanayo.
Madaxda Safaaradda Soomaaliya ee Turkiga ayaa kulan la qaatay mas’uuliyiin ka tirsan Wasaaradda caafimaadka Turkiga oo ay ka wada hadleen xaaladda caafimad dhaawacyada Isbitaalada jiifa iyo in la filans karo mustaqbalka dhaw qeyb kale hadii ay dowladda Turkiga naga caawin karto.
Dhinaca kale Agaasimaha Waaxda Caafimaadka Guud ee Wasaaradda Caafimaadka Soomaaliya waxa uu la kulmay Agaasimaha Guud ee Wasaaradda Caafimaadka Turkiga Oner Guner iyo Madaxa qeybta xiriirka iyo siyaasadda dibadda Dr Selemi waxayna ka wada hadleen xoojinta xiriirka labada Wasaaradood ee mustaqbalka dhow iyo kan fog iyo sidii loosii wadi lahaa caawinta dhaawacyada Soomalida.
