Raysal wasaaraha Soomaaliya Mudane Xasan Cali Khayre wuxuu ka qayb galayaa kulan sanadle ah oo lagu qabto magaalada Davos oo ku taala dalka Switzerland isla markaana arrimaha dhaqaalaha iyo Siyaasadda caalamka lagu falanqeeyo, kaas oo ay isugu yimaadaaan shirkadaha adduunka u dhaqaalaha badan oo shirkadda ugu yar sanadkii faa’iido hal Bilyan ah soo xerayso iyada oo aan loo ogolayn shirkadaha yar yar, waxaana lagu casuumaa madaxda dalalka rajjadda maalgashiga laga qabo, kuwaas oo isugu jira Madaxweyne, Raysal Wasaare Iyo Wasiirado.
Waxaa lagu odorosaa khatarta dhaqaale iyo siyaasadeed ee Adduunka ku soo wajahan iyo qaabka looga hortagi karo, waxa kale oo ay shirkaduhu kulankan madaxda uga faa’iideystaan siday xidhiidh ula samayn lahaayeen, goobaha ugu habboon ee maalgashi lagu samayn karana madaxdaas ugala sheekaysan lahaayeen, waxaana la qabtaa doodo iyo aragi isweydaarsi, waxaa lagu marti galiyaa saxafiyiin iyo khubaro la soo xulay.
Soomaaliya Waa markii ugu horaysay ee lagu casuumo tan iyo markii kulanka la aasaasay 1971, waxaana muuqata in shirkadaha caalamiga ahi xilligan Soomaaliya xiisaynayaan, isla markaana doonayaan in ay xidhiidh la yeeshaan dawladda Soomaaliya, waana talaabo weyn oo Soomaaliya hore u qaaday marka la fiiriyo ahmiyadda uu leeyahay kulanka Davos ee dalka Switzerland.
Shaki kuma jiro in xukuumadda Xasan Cali Khayre dadaal dheeraad ah ku bixisay sidii ay dawladda Soomaaliya uga qayb gali lahayd kulankan, waxaana hubaal ah in sanadkii ay xukuumaddu jirtayba ka shaqaynaysay sidii kulankan ay uga qayb gali lahayd, waana goobaha xukuumadda Khayre ay uga muuqato in ay taqaano qaabka hilabka garabka loo ugaadhsado.
Waa arrin mudan in xukuumadda lagu bogaadiyo, sababtoo ah faa’iidada ka soo noqon karta kulankan waxay noqon kartaa mid badan, iyadda oo loo baahan yahay in kulamadan la joogteeyo, sahal maaha in si fudud maalgashi caalamiya lagu helo , waana arrin qaadan karta sannado, una baahan in kalsooni la dhiso, sababtoo ah shirkadaha maalgashiga ku salaysan aad ayey hantidooda ugu baqaan, goobta ay galinayaana waa in ay tahay goob xasiloon. Haddii xukuumadani ay ku dadaasho xasilinta nabadda iyo isu socodka goboladda, waxaa hubaala in muddo kooban kalsooni caalamiya iyo mid maal gasho la heli doono idinka ilaahay.
Guusha kale ee kulanka Davos ka soo hooyatay ayaa ah sida ay hay’ada IMF “Hay’ada Lacagta Adduunka” ugu heelantahay in Soomaaliya deynta laga dhaafo haday ku sii waddo shaqada sida ay hadda ku socoto waxayna arrintaasi ka soo baxday kulankay Davos ku yeesheen madaxa Hay’ada IMF Christine Legarde iyo RW Xasan Cali Khayre.
