Alle ha u naxariistee waxaa galabta Muqdisho ku geeriyootay fanaanadii Qaranka Saynab Xaaji Cali Baxsan oo ka mid ahayd fanaaniinta Soomaaliyeed ee mudada dheer caanka ah, sida ay inoo xaqiijiyeen ehelkeeda.
Saynab waxay heesaysay 1964-tii ka hor, waxaana ay caan noqotay markii ay ku biirtay kooxdii xoogga dalka, waxaana Riwaayaddii ugu horraysay ee wax ka jisho ay ahayd Alla Aamin Ma Iisho, taas oo uu alifay Abwaan Axmed Saleemaan Bidde.
Fanaanadda oo qaadday heeso badan oo Jacayl iyo wadani leh ayaa ka mid ahayd fanaaniintii ugu horreeyey ee lagu aas aaso kooxdii Waaberi, waxaana ay qayb ka ahayd riwaayado badan oo si wayn bulshada Soomaaliyeed ugu dhex faafay.
Waqtigii burburka Saynab Xaaji Cali Baxsan inta badan waxay ku noolayd Muqdisho, marka laga reebo Jabuuti iyo Turkiga oo caafimaad ahaan loogu qaaday, waxaana ay dhawrkii sano ee ugu dambaysay ay ahayd dhul yaal.
Sii hayaha Wasiirka Warfaafinta Xukuumadda Federaalka Soomaaliya Maxamed Cabdi Xayir, Hobollada Waaberi iyo bahda suugaanleyda Soomaaliyeed ayaa ka tacsiyeeyey geerida Marxuum Saynab Xaaji Cali Baxsan.
“Naxariistii Janno Alle ha ka waraabiyo Abwaanadii Qaranka Saynab Xaaji Cali Baxsan oo galabta ku geeriyootay gurigeeda oo ku yaal magaalada Muqdisho. waxay ahayd halyey Qaran, waxay ku qaadatay halganadii Gobanimo doonka, difaacida Sharafka iyo karaamada Ummadda Soomaaliyeed bilado dhowr ah. Allaha ha u naxariisto, guud ahaan Ummadda Soomaaliyeedna Samir iyo iimaan Allaha ka siiyo” ayuu yiri Mudane Maxamed Cabdi Xayir Maareeye.
Inaa Lilaah Wa Inaa Ilayhi Raajicuun
