Kulankaan oo ah mid lagu soo dhaweynayay ganacsatada Soomaalida ee dalka Kenya iyo magacaabista Ra’iisul wasaaraha cusub ee Soomaaliya ayaa waxaa ka soo qeybgalay Wasiirka ganacsiga, ganacsato iyo marti sharaf kale oo kulanka lagu casuumay, waxaana kulanka soo qaban qaabiyay rugta ganacsiga Soomaaliyeed.
Kulankan ayaa intiisa badan ahaa mid diiradda lagu saarayay xoojinta iyo wada shaqeynta ganacsatada Soomaaliyeed ee wadanka Kenya ku dhaqan iyo kuwa gudaha dalka ku ganacsada.
Dr Sheekh Maxamed Shakul iyo Ibraahim Maxamed Xuseen oo ah ganacsatada Soomaaliyeed ee dalka Kenya ee lagu casuumay kulanka ayaa ka mahadceliyay kulanka soo dhaweynta ah ee ay u sameeyeen rugta ganacsiga Soomaaliyeed, waxaana ay tilmaameen inay muhiim tahay in ganacsatadu ay ka wada shaqeeyaan horumarka ganacsiga Soomaaliya meelkasta oo ay xarumo ku leeyihiin.
Guddoomiyaha Rugta Ganacsiga Soomaaliyeed Maxamuud Cabdi Cali Gabeyre oo kulanka ka hadlay ayaa sheegay in ujeedka kulanka uu ahaa in wada shaqeyn lala sameeyo ganacsatada Soomaaliyeed ee wadanka Kenya, isagoo dhanka kale hambalyo u diray Ra’iisul Wasaaraha cusub ee dalka.
Wasiirka Ganacsiga iyo Warshadaha ee Xukuumadda Soomaaliya Eng. C/rashiid Maxamed Axmed ayaa ku baaqay in ganacsatadu ay ka qeyb qaataan dib u dhiska dalka, isla markaana uu soo dhaweynayo in ganacsatada gudaha iyo kuwa dibada ay yeeshaan xiriir ganacsi oo xoog leh, waxaana uu dhinac kale soo dhaweeyay guddoomiyaha rugta ganacsiga ee Hirshabeelle ee dhawaan halkaasi lagu doortay..
