Golaha Aqalka sare BFS ayaa yeeshay kal-fadhiga 5aad kulankiisa 3aad, ajandahana waxa uu ahaa Dhagaysiga warbixinta guddiga la socodka iyo dib u eegista dastuurka iyo Akhrinta 1aad ee Hindise sharciyeedka xaqsiinta Siyaasiyiinta.
Kulanka ayaa waxaa shir guddoominayay guddoomiye ku-xiggeenka 1aad golaha aqalka sare baarlamaanka federaalka Soomaaliya sen, Abshir Maxamed Axmed.
Sen. Cabdi Xasan Cawaale Qeybdiid Guddoomiyaha guddiga la socodka iyo hirgelinta dastuurka BFS ayaa ka hadlay dhismaha guddiga iyo xubnaha uu ka kooban yahay, waxa uuna sheegay in guddiga uu ka kooban yahay 16 xubnood oo ka kala socda labada aqal baarlamaanka iyo xubno ka kala socda dowlad goboleedyada xubnaha ka ah dowlada federaalka Soomaaliya.
Sen. Xuseen Sheekh Maxamuud Xoghayaha guddiga la socodka iyo hirgalinta dastuurka BFS ayaa sharaxaad ka siiyay golaha qodobada laga soo shaqeeyay iyo kuwa dhinaca awood qaybsiga ugu maqan dowladda dhexe iyo dowlad goboleedyada.
Guddoomiye ku-xiggeenka 1aad golaha aqalka sare baarlamaanka federaalka Soomaaliya sen. Abshir Maxamed Axmed ayaa sheegay in la guda galayo ajandaha labaad ee fadhiga ee ah Akhrinta 1aad ee hindise sharciyeedka Xaqsiinta Siyaasiyiinta, waxaana senatarada ka hor akhriyay sen. Mahdi Daahir Sheeq Nuur oo xubin ka ah guddiga xeer hoosaadka golaha aqalka sare.
