Kulankii 28-aad ee Kalfadhiga 6aad ee Golaha Aqalka Sare Baarlamaanka Federaalka Soomaaliya ee maanta oo ajandihiiusa ahaa Akhrinta 2aad ee Hindise- Sharciyeedka Howlgabnimada, ayaa waxaa shir guddoominayay Guddomiyaha Golaha Aqalka Sare ee Baarlamaanka Federaalka Soomaaliya Senator Cabdi Xaashi Cabdullahi oo ay ku-wehliyaan Guddomiye Ku-xigeenka 1aad ee Golaha Aqalka Sare Senator Abshir Maxamed Axmed iyo Guddomiye ku-xigeenka 2aad ee Golaha Aqalka Sare Senator Moowlid Xuseen Guhaad.
Fadhiga Golaha Aqalka Sare waxaa ku sugnaa Wasiirka Wasaaradda Gaashandhiga Xukuumadda Federaalka Soomaaliya Mudane Xasan Cali Maxamed, Wasiir Ku-xigeenka Wasaaradda Gaashaandhiga Mudane Cabdullaahi Colaad Rooble.
Guddomiyaha Guddiga Difaaca iyo Amniga Golaha Aqalka Sare ee Baarlamaanka Federaalka Soomaaliya Senator Maxamed Amiin Sheekh Cismaan ayaa Golaha ka hor Akhriyay Hindise- Sharciyeedka Howlgabnimada, Xaqsiinta iyo Hibooyinka Xubnaha Ciidamada Qalabka Sida.
Senatorada qaarkood ayaa su’aalo weydiiyay Wasiirka Wasaaradda Gaashaandhigga, iyadoo kuwa kalana fikir ku aadan da’da ciidanka iyo xaqsiintooda u gudbiyay Wasiirka.
Wasiirka Gaashaandhigga Xukuumadda Federaalka Soomaaliya Mudane Xasan Cali Maxamed ayaa su’aalaha ka jawaabay, isagoo dhinaca kale sheegay in uu qaadan doono afkaarta iyo tallooyinka ay Xildhibaannada qaar soo gudbiyeen.
Guddomiye Ku-xigeenka 1aad ee Golaha Aqalka Sare Senator Abshir Maxamed Axmad oo fadhiga soo xiray ayaa sheegay in guddiga Difaaca Aqalka Sare uu uga mahadcelinayo sida fiican ay ula shaqeeyeen.
