Xildhibaananda Golaha Aqalka Sare oo maanta kalfadhigii 6-aad kulankiisa 23-aad ee Golaha Aqalka Sare ku yeshay Muqdisho ayaa kaga hadlay akrinta 2-aad ee Hindise Sharciyeedka wax ka badalka xeerka saxaafadda dalka.
Kulanka oo uu shir guddoominayay Guddoomiyaha Golaha Aqalka Sare Senator Cabdi Xaashi Cabdullaahi ayna goob joog ka ahaayeen Wasiir ku-xigeenka Wasaarada Warfaafinta Mudane Aadan Isaaq, Agaasimaha guud ee Wasaaradda Warfaafinta Mudane Cabdiraxmaan Yuusuf Sheekh Al-Cadaalla iyo Agaasimeyaal ka tirsan Wasaaradda.
Xog-hayaha Guddiga Horumarinta Adeega Bulshada, Arrimaha Bena’aadannimada, Warfaafinta iyo Dhaqanka, Aqalka Sare Senator Zamzam Dahir Maxamuud ayaa marisay Akhrinta 2aad ee Hindise sharciyeedka wax ka badalka Xeerka Saxaafadda.
Senotarada ayaa qodobada qaar ka hadlay, waxaana ay ka dhiibteen afkaartooda ku aadan wax ka badal lagu sameeyo.
Wasiir ku-xigeenka Wasaarada Warfaafinta Mudane Aadan Isaaq iyo Agaasimaha guud ee Wasaaradda Mudane Cabdiraxmaan Yuusuf Sheekh Al-Cadaalla ayaa mudanayaasha u sharxay qodobada wax ka badalka lagu sameeyay iyo kulamada ay la qaateen madaxda Warfaafinta ee dowlad Goboleedyada dalka.
Guddoomiyaha Golaha Aqalka Sare Senator Cabdi Xaashi Cabdullaahi ayaa sheegay in kulamada xiga ay Goluhu ka doodi doonaan Hindise sharciyeedka wax ka badalka Xeerka Saxaafadda.
