Golaha deegaanka Degmada Gaalkacyo oo yeeshay kulanka 4-aad ee kal-fadhiga 7-aad ee golaha oo uu shir gudoominayay Guddoomiyaha Degmada Gaalkacyo mudane Cabdiraxmaan Sheekh Xasan ayaa ansixiyay habraaca Waxbarashada dowladda hoose ee Degmada Gaalkacyo.
Habraaca Waxbarashada dowladda hoose ee Degmada Gaalkacyo oo ah habraac nidaaminaya Waxbarashada aas aasiga ah ee Degmada , soona maray akhrin iyo faafreeb ayaa waxaa cod gacan taag ah ku ansixiyay golaha Deegaanka kadib markii ay meelmarinta habraacaan una codeeyeen 15 xubnood oo kulanka fadhisay, mana jirin Xildhibaan ka aamusay ama diiday ,
Habraacaan waxaa golaha u soo gudbisay waaxda arrimaha bulshada dowladda hoose ee Degmada Gaalkacyo ee Dowlad gobaleedka Galmudug
Sidoo kale kalfadhiga 7-aad kulankiisa 4-aad ee golaha deegaanka ayaa la iskula soo qaaday habraaca xeerka barakacayaasha, balse dood farabadan oo ku aadan qaar ka mid ah habraaca xeerka barakacayaasha ayaa waxaa ka biyo diiday inta badan xubnihiii golaha deegaanka kuwaaa oo codsaday in dib loogu laabto qodabada ay tabashada ka qabaan, taas oo markii danbe la isku waafaqay in qaar ka mid ah qodabada habraaca xeerka barakacayaasha ee ay soo gudbisay waaxda arrimaha bulshada Dowladda hoose ee dagmada Galkacyo dib loogu laabto.
