Munaasabad maanta lagu qabtay magaalada Muqdisho ayaa looga dhawaaqay Golaha Isutaga Jaamacadaha Somaaliyeed oo ay ku mideysan yihiin inta badan Jaamacaha, waxaana ka qeybgalay munaasabadaasi Xildhibaanno ka tirsan Baarlamanka Somaaliya, Masuul katirsan Wasaaradda waxbarashada iyo tacliinta sare, Gudoomiyaha Degmada Hodan iyo marti sharaf kale.
Guddoomiye ku xigeenka Golaha Isutaga Jaamacadaha Somaaliyeed Prof Maxamed Xasan oo ugu horeyn munaasabadda ka hadlay ayaa ku dhawaaqay in laga bilaabo maanta Golaha uu si rasmi ah u shaqeyn doono, isla markaana ujeedkooda uu yahay in la mideeyo Jaamacadaha dalka ka jira.
Related posts
“Madashani waxaanu dooneynaa inaa daahfurno Midowga Jaamacadaha Soomaaliyeed oo mudo dheer ka fikerayay in la mideeyo waxbarashada sare, iyagoo kaashanaya daladaha dalka ka jira sidaa ogtihiin waxbarashadu waxay sharaf ku leedahay inay mideysan tahay, burburkii kadib in la midoobo waa wax fiican oo hormar ah” ayuu yiri Maxamed Xasan.
Agaasimaha waaaxda Jaamacadaha Wasaaradda Waxbarashada iyo Tacliinta sare Bashiir Maxamed Jimcaale ayaa balanqaaday in Wasaaradda Waxbarashada ay garab istaagi doonto Golaha maanta loogu dhawaaqay, isagoo ku booriyay in laga qeyb geliyo dhamaan Jaamacadaha dalka.
“Awal waa ku dhibtoon jirnay Jaamacadaha meel aan kala xiriirno, maanta waxaa farxad noo ah inaan helno hal meel oo aan kala xiriirno, anigoo ku hadlaya magaca Wasaaradda Waxbarashada waxaan idiin balanqaadayaa inaan shahaado qiimo badan idiin siin doono”ayuu yiri Bashiir.
Xildhibaan Maxamd Cumar Dalxa oo ka mdi ahaa mas’uuliyiintii ka hadashay munaasabdda lagu daahfurayay Golaha Isutaga Jaamacadaha dalka ayaa kula dardaarmay madaxda Golahan in Gobolada dalka lagu balaariyo tacliinta sare, si ardayda ay fursad ugu helaan in gobollada ay joogaan ay ka heli karaan waxbarasho Jaamacadeed.
“Waxbarashadiina waxa ay kusoo koobantay caasimadda oo ay saxmad ka jirto oo dhinaca Jaamacadaha iyo iskuulada, duruufahaan sababtay waa ognahay laakiin mustaqbalka waxaan rabnaa in Golaha Isutaga Jaamacadaha ay isku balaariyaan si ay tacliintii u wada gaarsiiyaan ilaa tuulada, waayo jahliga ayaa sabab u ah dhibaatada dalkeena uu kujiro” ayuu yiri Prof Dalxa.
