Xildhibaannada Golaha Wakiillada Dowlad Goboleedka Puntland ayaa maanta si rasmi ah waxay u ansixiyeen Xeerka Hawlgabka iyo Liiltirka ee Shaqaalaha rayidka Dowlad Goboleedka Puntland, kaasi oo horay Xukumadda u soo ansixisay.
Guddoomiyaha Golaha Wakiiladda Puntland Mudane Cabdirashiid Yuusuf Jibriil ayaa shir guddoomiyay Fadhiga 19-aad, Kalfadhiga 45-aad ee Golaha Wakiillada Puntland, waxaana goob joog ka ahaa Guddoomiye ku xigeenka 1-aad Golaha Wakiiladda AVV: Cabdicasiis Cabdullahi Cusmaan.
Xildhibaanada oo dood ka yeeshay ansixinta xeerkaan horayna muddo saddex beri ah u soo akhristay ayaa ugu dambeyn geliyay cod xeerka.
Gudoomiyaha Golaha Wakiiladda Dowlad Goboleedka Puntland Mudane Cabdirashiid Yuusuf Jibriil ayaa ku dhawaaqay in 38 Mudane oo fadhiga maanta joogay in 34 Mudane u codeysay meel-marinta Xeerka Hawlgabka iyo Liiltirka ee Shaqaalaha rayidka Dowladda Puntland, halka 4 Mudane ay ka aamuseen, mana jirin cid diiday.
Xeerka Hawlgabka iyo Liiltirka ee Shaqaalaha rayidka Dowlad Goboleedka Puntland ayaa noqonaya mid muhiimad weyn u leh shaqaalaha Puntland marka ay gaaraan da’da Hawlgabka.
