Kulan ay isugu yimaadeen Golaha Wasiirada, oo uu shir guddoominayay Ra’iisul wasaare ku-xigeen Mudane Maxamed Cumar Carte ayaa maanta looga hadlay arrimo ay ka midyihiin amniga, dib u eegis lagu sameyn doono agaasimayaaha guud ee Wasaaraha dowladda, tacadiyo ciidanka AMISOM ay ka geysteen magaalooyinka Marko iyo Xudur iyo arrimo kale.
Kulanka ayaa ugu horeyn waxaa warbixinno xagga amniga ku saabsan lagaga dhageystay Wasiirada Amniga, gaashaandhigga iyo arrimaha gudaha, kuwaasi oo golaha uga warbixiyay xaaladaha amniga ee dalka, iyadoo Wasaaradda batroolka ay Goluhu hor dhigtay hindise sharciyeed ku saabsan xaga batroolka dalka kaasi oo uu Goluhu ka doodi doono.
Wasiiru-dowladaha Wasaaradda Warfaafinta, dhaqanka iyo dalxiiska ee Xukuumadda Soomaaliya Maxamuud Cabdi Xasan “Beekoos” ayaa sheegay in guddi heer Wasiir ah loo saaray dib u eegis lagu sameynayo agaasimeyaasha guud ee Wasaaradaha, isagoo xusay in goluhu ay ka doodeen dhacdooyin ka dhacay magaalooyinka Marka iyo Xudur oo lagu eedeeyay ciidamada AMISOM inay xad gudub u geysteen dad shacab ah.
Ciidanka AMISOM ee Nabad ilaalinta u jooga dalka ayaa lagu eedeeyay inay falal tacadiyo ah u geysteen dad shacab ah oo ku sugnaa magaalooyinka Marka iyo Xudur ee gobollada Shabeelaha Hoose iyo Bakool, waana tan keentay in Golaha Wasiirada ay maanta ka doodaan
