Kulanka Guddiga joogtada ah ee Baarlamaanka Federaalka Soomaaliya oo ay kasoo qeybgaleen Guddoomiyeyaasha Guddiyada joogtada ah ee Baarlamaanka waxaa shir guddoominayey Guddoomiye ku-xigeenka Labaad ee Golaha Shacabka Mudane Mahad Cabdalla Cawad, ayadoo sidoo kalena shirka ay goobjoog ka ahaayeen quburro ka socotay hay’adda UNDP oo Qaramada Midoobay u qaabilsan horumarinta.
Ajndaha kulanka waxaa ugu horeeyey oo laga hadlay casriyeynta howlaha Baarlamaanka si la mid ah Baarlamaannada Caalamka, waxaana quburrada iyo guddiga joogtada ahi ay is dhaafsadeen sida ugu haboon uguna dhaqsiyaha badan ee loo horumarin karo howlaha Golaha sidoo kalena waxaa laga hadlay shaqooyinka guddiyada Joogtada iyo sidii loo fududeyn lahaa si gaar ah guddiyada hada gacanta ku haya sharciyada la doonayo in lagu ansixiyo Kalfahigan 7aad.
Xoghayaha guud ee Golaha Shacabka Mudane Cabdikariin Xaaji Cabdi (Buux) oo markii uu kulankaasi soo geba geboobay kadib la hadlay Warbaahinta Qaranka Soomaaliyeed ayaa tilmaamay in sidoo kale ay guddiga joogtada ah ee Golaha Shacabku ka hadleen ajandeyaasha kulamada ugu soo horeeya ee Baarlamaanka, si gaar ahna shuruucda horutebinta leh oo ay koow ka tahay sharciga lagu dhisayo Maxkamadda Dastuuriga ah ee Dalka.
Guddiga joogtada ah ee Baarlamaanka Federaalka Soomaaliya oo ka kooban Guddoonka Golaha Shacabak, guddoomiyeyaasha guddiyada joogtada ah,habdhowreyaasha iyo xoghayaha guud ee Golaha ayaa inta badan dejiya ajandayaasha kulanka Baarlamaanka, waxaana kulankoodan uu imaanayaa xilli Baarlamaanka uu ku guda jiro maalmihiisii ugu horeeyey ee Kalfadhiga 7aad waloow kulankoodii ugu dambeeyey uu u qabsoomi waayey soo xaadirid la’aan ama ka qeybgalka Xildhibaannada oo aan loo fulin sidii ay xeer hoosaadkooda ku qorteen oo ah 50+1 tirada guud ee Golaha hadii aan tiro ahaan u iraahdana waa 139 Xildhibaan kaliya.
