Guddiga soo jeedinta wax ka bedelka iyo kaabista dastuurka kumeel gaarka JFS ayaa maanta kulan gaar ah la yeeshay guddiga madaxa banaan ee hirgelinta iyo wax ka bedelka dastuurka.
Kulanka oo ka dhacay xarunta golaha shacabka ee Villa Hargeysa waxaa shir guddoominayey guddoomiyaha guddiga Xildhibaan Mahdi Maxamed Guuleed, iyadoo ay kasoo qeybgaleen xubnaha guddiga kumeel gaarka ah.
Guddiga soo jeedinta wax ka bedelka iyo kaabista dastuurka kumeel gaarka ah JFS ayaa xogwareysi ku saabsan waxqabadkooda la yeeshay guddiga madaxa banaan ee hirgelinta iyo wax ka bedelka dastuurka KMG, iyadoo intaasi kadibna ay guddiga weydiiyeen su’aalo ku saabsan warbixintooda.
Guddiga ayaa ugu mahadceliyey xubnaha ka socday guddiga madaxa banaan warbixintooda wanaagsaneyd ee ay siiyeen guddigooda si hawlaha guddiga uu u xilsaaray Baarlamaanka Federaalka Soomaaliya uu ugu noqdo dhameystir, maadaama la doonayo in golaha la horgeeyo kalfadhiga 3-aad ee golayaasha.
