Doorashada Guddoonka Guddiga Madaxa Bannaan ee Xuduudaha iyo Federaalka oo ay ku baratamayeen musharixiin u taagan Xilalka Guddoomiyaha, Gudoomiye ku xigeenka iyo Xoghayaha Guud ee Guddiga ee Afarta sanno ee soo socota isla markaana ay goob joog ahaayen mas’uuliyiin ka kala socday qaar ka mid ah hey’adaha Dowladda iyo marti sharaf kala duwan ayaa Maanta ka qabsoontay magaalada Muqdisho, waxaana ugu horeyn habraaca loo marayo doorashada sharaxay Guddoomiyaha guddiga qabanqaabada doorashada Axmed Sheekh Muqtaar.
Guddoomiye Khaliif Cabdikariin Maxamed oo Todobadii Sanno ee Lasoo dhaafay hogaaminayey Guddiga iyo ku xigeenkiisa Xuseen Xaashi Xasan oo labadaba ahaa musharixiin u taagan xilka Gudoomiyaha Guddiga ayaa inta aysan doorasha bilaaban ka hor ku dhawaaqay inay tanasuleyn.
Intaa Kadib sida xeer hoosaadka Guddiga qabo Sideeda Xubnood ee madasha xaadirka ku ahaa ayaa Cod gacantaaga ugu cudeeyay Musharaxa kaliya ee soo haray oo ahaa Abukar Sheekh Cabdi Ibraahim waxaana ogolaaday 7 xubnood halka uu ka aamusay 1 qof sida uu ku dhawaaqay gudoomiyaha Guddiga qaban qaabada.
Waxaana sidaas xilka Gudoomiyaha Guddiga Madaxa Bannaan ee Xuduudaha iyo Federaalka ee Afarta Sano ee soo socota ugu guuleystay Mudane Abuukar Sheekh Cabdi Ibraahim.
Sidoo kale waxaa iyana isla goobta lagu doortay Guddoomiye ku-xigeenka iyo Xoghayaha Guud ee Guddiga Waxaana ku kala guuleystay Maxamed Cismaan Cabdullaahi oo loo doortay Guddoomiye ku xigeen kana guuleystay musharax Axmed Seylici Muuse iyo Zakariye Saciid Cismaan oo isna loo doortay Xoghayaha Guud ee Guddigga madaxa Bannaan ee Xuduudaha iyo Federaalka kadib markii uu ka codbadiyay musharax Maxamed Muxudiin Sheekh Mursal sida uu markale ku dhawaaqay Guddoomiyaha guddiga qabanqaabada doorashada Axmed Sheekh Muqtaar.
Doorashada kadib Ku simaha Guddiga Madaxa Bannaan Ee Doorashooyinka Qaranka Xuseen Cabdi Aadan ayaa u hambalyeeyay Gudoonka cusub wuxuuna codsaday in lala shaqeeyo.
Ugu dambeyn Guddoomiyaha cusub ee Guddigga Madaxa Bannaan ee Xuduudaha iyo Federaalka Mudane Abukar Sheekh Cabdi Ibraahim ayaa ballanqaaday inuu si hufan u gudan doono masuuliyadda loo doortay, islamarkaana uu dardar gelin doono Howlaha shaqo ee hortabinta u leh Guddiga.
