Lacagtaan oo lagu wareejiyay guddiga isxilqaan ee qaabilsan dhismaha garoonka diyaaradaha degmada Xudur ayaa waxay ka timid Wasiiru dowlaha Arrimaha Gudaha, Federaalka iyo dib u heshiisiinta ee Xukuumadda Federaalka Soomaaliya Mudane Aadan Cabdinaasir, taasi oo ahayd lacag dhan kun dolar oo uu uga qeyb qaadanayo barnaamijka isxilqaaa ee garoonka lagu dhisayo iyo shan boqol dolar oo ka timid Maxamed Cabdullaahi Cani oo ka mid ah dhallinyarada qurba joogta ah ee ka soo jeeda Gobolka Bakool.
Guddiga ayaa u mahadceliyey Wasiir Aadan Cabdinaasir iyo Maxamed Cabdullaahi, sida ay uga qeyb qaadanayaan dhismaha ka soconayo garoonka magaalada Xudur, waxaana ay sheegeen inay tahay tallaabo ku dayasho mudan.
14-ka bishaan dhamaanaysa ee Luulyo ayaa labilaabay dhismaha qeybo ka kooban qolal ay dadka ku nastaan, masjid, suuli iyo goobaha dadka dhoofaya lagu hubiyo, (Terminal) kaddib markii Wasiirka Gaadiidka iyo Garoomada Koonfur Galbeed Xasan Xuseen Maxamed uu diyaarad u kireeyey shamiindadii lagu dhisi lahaa garoonka oo adkayd in laga helo bakhaarada magaalada Xudur, taas oo dhiiragelisay guddiga isxilqaan ee u istaagay hagaajinta dhabaha (run way) ay diyaaradaha caga dhigtan.
Garoonka diyaaradaha ee Xudur waa waddada kaliya ee u furan magaalada, wax walba oo soo gala daiyaarad ayaa lagu keenaa, taas oo sababtay in shay kasta qiimihiisa uu saddex jibaarmo.
