Munaasabad lagu sagootinayay 37 arday oo deeq waxbarasho ka helay dalka Shiinaha islamarka ka mid ahaa ardaydii 2017/2018 ayaa maanta lagu qabtay magaalada Muqdisho ee caasimadda dalka.
Munaasabada waxaa Goob Joog ka ahaa Wasiirka Wasaaradda Waxbarashada Hiddaha iyo Tacliinta Sare Mudane, Cabdullaahi Goodax Barre ,Gudoomiyaha Aqalka Sare Cabdi Xaashi Cabdullahi, Wasiirka Boostada iyo Isgaarsiinta, Qunsulka Safaaradda Shiinaha ee Soomaaliya, waalidiin iyo marti sharaf kale oo lagu casumay munaasabadda.
Wasiirka Wasaaradda Waxbarashada Hiddaha & Tacliinta Sare Mudane, Cabdullaahi Goodax Barre ayaa ka hadlayo ahmiyada ay leedahay horumarinta Waxbarashada Ardayda Soomaaliyeed, islamarkaana kan Wasaarad ahaan ay dadaal ku bixinayaan helidda deeqdan Waxbarasho ee dhallinyarada Soomaaliyeed.
Gudoomiyaha Aqalka Sare Cabdi Xaanshi Cabdullaahi oo isana ka hadlay Garab istaaga Dowlada Shiinaha ay siiso dowlada Soomaaliya ayaa xusay in tani aysan aheyn markii ugu horeysay islamarkaana dowlada Shiinaha ay hore dalka ugu fulisay mashaariic ay ka mid yihiin wadooyinka iyo goobaha taariiqiga ah.
Wasiirka Wasaaradda Boostada iyo Isgaarsiinta XFS. ayaa ka hadlay muhiimada Waxbarashadu ay u leedaha dalka iyo in la horumariyo tiknoolajiyada taas oo ahmiyad gooni ah uleh talka .
Qunsulka Safaaradda Shiinaha ee Soomaaliya, ayaa sheegay in dowladda Soomaaliya iyo Dowladda Shiinaha uu ka dhaxeyo xariir qoto dheer kaas oo qeyb ka ah xariirka wanaagsan ee labada dowladood, Qunsulka Safaaradda Shiinaha ee Soomaaliya ayaa balan qaday in dowlada Shiinaha ay sare u qaadeyso deeqaha waxbarasho oo ay siiyaan Soomaaliya.
Waalidiinta ardayda nasiibka u helay deeqaha Waxbarasho ee dalka Shiinaha ayaa u mahadceliyay Wasiirka Wasaaradda Waxbarashada mudane Cabdullaahi Goodax Barre dadaalka uu ugu jiro sidii ardayda Soomaaliyeed ay deeqaha waxbarasho ay ugu heli lahaayeen si cadaalad ah.
