Xildhibaanno ka tirsan Golaha Shacabka iyo Mas’uuliyiinta Maamulka Gobolka Banaadir ayaa ka qeyb galay munasabad kooban oo uu xilka kula wareegayay Guddoomiyaha Cusub ee Degmada Cabdicasiis Mahdi Faarax Cabdulle, kaasi oo lagu qabtay xarunta Degmada ee Gobolka Banaadir.
Ka qeyb galayaasha munaasabadda ayaa ka sheekeeyay taariikhda degmada, waxaana ay balan qaadeen inay la shaqeyn doonaan maamulka cusub ee degmada.
Guddoomiye ku-xigeenka arrimaha Bulshada ee Maamulka Gobolka Banaadir Marwo Basma Caamir Axmed (Jakeeti) oo xaflada ka hadashay ayaa ka codsatay shacabka reer Cabdicasiis in ay la shaqeeyaan Guddoomiyaha cusub si uu u guto waajidka loo igmaday.
Qaar ka mid ah Xildhibaannadii munaasabadda ka hadlay ayaa ku booriyay Guddoomiyaha cusub in uu ka shaqeeyo horumarinka iyo isdhexgalka bulshada.
