Guddoomiyaha Gobolka Banaadir ahna Duqa Muqdisho C/raxmaan Cumar Cusmaan (Eng. Yariisow) oo la kulmay Safiirka Turkiga u jooga Soomaaliya Amb. Olgan Bekar, ayaa kala hadlay arrimo dhowr ah oo ku saabsan xaaladda dalka gaar ahaana gobolka Banaadir.
Amb. Olgan Bekar ayaa ugu horeyn u hambalyeeyay Guddoomiyaha cusub ee Gobolka Banaadir Eng. Yariisow, waxaana uu xusay in uu jiro xiriir aad u wanaagsan oo ka dhaxeeya dowladaha Turkiga iyo Soomaaliya, islamarkaana si gaar ah ay ula shaqeeyaan dowladda Hoose ee Muqdisho.
Waxaa uu sheegay inay ka wada hadleen baahiyaha dadka Muqdisho, iyadoo Turkiga uu ka mid tahay taageeraha ugu weyn ee dowladda Soomaaliya, horayna mashaariic horumarineed ka fuliyay Muqdisho, sida dhismaha waddooyinka, xarumo caafimaad iyo kuwo waxbarasho.
Guddoomiyaha cusub ee Gobolka Banaadir C/raxmaan Cumar Cusmaan (Eng. Yariisow) ayaa sheegay inuu ku faraxsan yahay kulanka Safiirka, isagoo xusay inay dardar gelin doonaan xiriirka wadashaqeyneyd ee u dhaxeeya Safaaradda Turkiga iyo Gobolka Banaadir.
Waxaan u mahadcelinayaa Safiirka Turkiga Olgan Bekar oo aan ka wadahadalnay dardargelinta xiriirka Gobolka Banaadir iyo Turkiga Turkish Embassy in Mogadishu”ayuu yiri gudoomiye Yariisow.
