Guddoomiyaha cusub ee Gobolka Banaadir Taabit Cabdi Maxamed ayaa maanta kormeeraya Aqalka dowladda Hoose ee Xamar, iyadoo gelinka dambe ee maanta uu si rasmi ah xilka la wareegi doono.
Guddoomiyaha cusub ayaa inta uusan xilka la wareegin waxaa uu kormeeri doona hantida guurtada iyo kuwa ma guurtada ee dowladda Hoose, waxaana uu booqasho ku tagi doonaa Aqalka dowladda Hoose ee Xamar, talisyada ciidanka iyo qaar ka mid ah degmooyinka Gobolka, waxaana kormeerka ku wehlinaya Guddoomiyihii hore ee gobolka iyo qaar kale oo ka mid ah mas’uuliyiinta gobolka.
Guddoomiye Taabit ayaa shalay ku booqday hoygiisa Guddoomiyihii hore ee Gobolka Banaadir ee xilka ka degaya Mudane Yuusuf Xuseen Jimcaale, iyadoo booqashadan aheyd salaan iyo kala war-qaadasho.
Kulan labada dhinac yeesheen ayay uga hadleen dar dar gelinta howsha gobolka, sii wadida howshii socotay iyo in Guddoomiyaha cusub uu caawa xilka si rasmi ah ugala wareega guddoomiyihii hore.
Guddoomiyaha cusub oo maalin ka hor dib ugu soo laabtay magaalada Muqdisho ayaa bilaabay kulamo uu la qaadanayo qeybaha bulshada ee gobolka ku nool, iyadoo xalay uu gurigiisa ugu tagay Malaaqa Xamar iyo Xamar daye Malaaq Cali Malaaq Maxamed Malaaq Wehliye.
