Guddoomiyaha Degmada Xudur ee xaruunta Gobolka Bakool Cumar Cabdulaahi Maxamuud “ATUU” ,ayaa maanta kormeer iyo indha-indheyn ku tagey mashruuca dib u ballaarin lagugu sameynaayo Warta ugu weyn magaalada Xudur ee lagu keediyo Biyaha ay isticmaalaan Bulshada, taasi oo bac lagu dhigaayo dhulkeeda si biyaha loogu keediyo iyo in Isha biyaha keena la ballaariyo.
Guddoomiyaha Degmada Xudur Cumar Cabdulaahi Maxamuud oo ka duulaayo balan-qaadkiisa ahaa in Shacabka Xudur ay heli doonaan biyo ku filan, ayaa kormeerey dib u ballaarinta lagu sameeynaayo Warta biyaha, waxaana halkaasi kusoo dhoweeyay shaqaalaha ku shaqeynaayo goobta oo ay ku amaaneen booqashadiisa iyo sida ay ugu go’antahey ka dhabeynta balan qaadkiisa, waxeyna sharaxaad ka siiyeen qaabka ay shaqadq u wadaan.
Guddoomiye Cumar Cabdulaahi Maxamuud, ayaa u mahadceliyay NGo-ga ku shaqeynaayo ee DARDO, oo garab ka helaya GIZ, wuxuuna sidoo kale ku amaaney siday marwaliba u garab taaganyihiin Bulshada magaalada Xudur ee dhibaatooyinka kala duwan heysta.
“Waxaan idinkaga mahadcelinayaa shaqada wanaagsan ee ballaarinta Warta ah aad sameyneysaan, si magaalaadaan Xudur ee dhibaatooyinka biyo la’aanta heysata looga bixi lahaa islamarkaana loo sameyn lahaa qorshe cad oo lagu keedinaayo biyaha, markalena reer Xudur aysan ka caban biyo la’aan ayaa naga go’an waana shaqadeenaa koowaad ee xoogeena isugu geyn doono”
Dhanka kale Guddoomiye Cumar Cabdulaahi Maxamuud ayaa sheegey inay jiraan qorsheyaal kale oo muhiim u ah nolosha dadka magaalada Xudur ay xoogga saari doonaan gaar ahaan Biyaha iyo Korontada sidii wax looga qaban lahaa muddo kooban, Waxaana kormeerka shaqo ee Gudoomiyaha ku wehlinaayey Gudoomiye kuxigeenka labaad ee maamulka Degmada Xudur Raxmo Nuur Dheere.
