Guddoomiyaha gobolka Banaadir ahna duqa magaalada Muqdisho mudane Cumar Maxamud Maxamed (Cumar Filish) ayaa daah furay ololaha wacyigelinta ka hortagga cudurka COVID-19 oo dhibaato adag ku haya nolasha iyo horumarka caalamka.
Aqalka Dowlada Hoose ayaa lagu soo bandhigay gaadiid ay ku xiran yihiin cod baahiyaal loogu talagalay in bulshada lagu gaarsiiyo fariimaha wacyigalinta ee ka hortagga Coronavirus.
Agaasimaha Caafimaadka gobolka Banaadir Maxamed Maxamuud Caddow ayaa sheegay inay tababaro siiyeen shaqaalaha waaxda caafimaadka si bulshada ay u siiyaan wacyigelin joogto ah.
Guddoomiye ku-xigeenka Maamulka Gobolka Banaadir Basma Caamir Jakeeti ayaa sheegtay in dowladda Hoose ee Xamar ay ka go’antahay wacyigelinta bulshada, isla markaana la joogteyn doono.
Guddoomiyaha gobolka Banaadir ahna duqa magaalada Muqdisho mudane Cumar Maxamud Maxamed (Cumar Filish) ayaa tilmaamay in dowladda Soomaaliya iyo maamulka Gobolka Banaadir ay xoojin doonaan ololaha wacyigelinta, isagoo xusay in la diyaariyay goob lagu karantiilayo dadka ka imaanaya wadamada uu ka jiro cudurka ee ka soo degaya garoonka diyaaradaha caalamiga ah ee Aadan Cadde.
“Waxaan halkan maanta ku daah fureynaa ololihii ku saabsanaa ka hortagga cudurka COVID-19 oo fara badan ku haya Dunida, waxaana halkan diyaar ku ah shaqaale u tababaran wacyigelinta bulshada” ayuu yiri Guddoomiyaha Gobolka Banaadir.
