Guddoomiyaha Gobalka Hiiraan Cabdulaahi Axmed Maalin oo uu wehliyo gudoomiyaha Degmada Beledweyne iyo Duqa Beledweyne ayaa ka qeyb galay munaasabad sagootin iyo soo dhaweyn isugu jirtay oo lagu kala badalatay ciidanka ATMIS qeybta Ethiopia kamid ah oo badal ahaa iyo kuwa cusub oo dhawaan gobolka Hiiraan soo gaaray.
Cabdullahi Axmad Maalin guddoomiye gobolka Hiiraan ayaa tilmaamay in Ciidamada ATMIS Qeybta Hiiraan ka joogto Ethiopia ay amniga gobolka door fiican ka qaateen.
Guddoomiyaha waxa uu u mahadceliyay ciidamada muddadii ay joogeen, waxuuna soo dhaweyay ciidanka cusub ee yimid.
Guddoomiye gobolka Hiiraan ayaa xusay in dhawaan markii uu dhamaado wajiga kowaad uu bilaaban doono wajiga labaad khawaarijta looga xoreyn doono galbeedka gobolka.
Ambassador Mukhtaar Maxamed oo ah Safiirka Ethiopia ee Soomaaliya oo dhankiisa munaasabadda ka hadlay ayaa amaanay sida dar-darta leh ee guddoomiyaha gobolka Hiiraan iyo bulshada degaanka ugu qeyb qaateen howlgalka Hiiraan.
Safiirka ayaa balan qaaday in dowladda Ethiopia ay diyaar u tahay in doorkeeda qaadan doonto, islamarkaana ciidanka diyaar yihiin.
