Guddoomiyaha Gobolka Shabeelaha Hoose ayaa sheegay in howlgalladan ciidamada xoogga dalka ay dhawaanahan ka socdeen gobolka, kuwaasi oo qorshuhu yahay in guud ahaan gobolka laga cirib tiro argagixisada Al-Shabaab.
Ibraahim Aadan Cali Najax oo la hadlay Radio Muqdisho ayaa hoosta ka xariiqay inay soo dhaweynayaan howlgalka ay ciidamadu kula wareegeen deegaanka Toorotoorow, ayna bogaadinayaan in howlgallada halkeeda ka sii socon doonaan.
“Ciidanka xoogga dalka gaar ahaan qeybta Kumaandooska ayaa gaaray deegaanka Toororoow oo ay hadda ka socdaan howlgallo amniga lagu xoojinayo, waxaan xaqiijinayaa in ciidanka ay si rasmi ah ula wareegeen deegaanka Toorotoorow, shacabkuna ay aad ugu faraxsanyihiin guulaha ay gaareen ciidamada” ayuu yiri Guddoomiye Ibraahim.
Guddoomiyaha ayaa sheegay in deegaanka Toorotoorow ay muhiimad gaar ah u lahayd dhagarqabayaasha Al-Shabaab, maadaama ay bulshada uga qaadi jireen lacago baad ah.
“Deegaanka Toorotoorow oo ka tirsan Degmada Awqdheegle waxa ay ka midtahay meelaha ay dadka rayidka ah uga qaadi jireen lacagaha baadda ah, runtii waxaa kaloo ay tahay meelaha ay ugu yaaleen maxkamad beeneedka ah ee lagu baneesanayo lacagaha shacabka” ayuu Guddoomiyaha Gobolka Shabeelaha Hoose hadalkiisa ku daray.
