Guddoomiyaha Hay’adda Maareynta Musiibooyinka Qaranka Soomaaliyeed ee SoDMA, Mudane Maxamuud Macallin Cabdulle ayaa maanta booqasho dhiirigalin ah ugu tagay Ciidamada Macawisleyda ah ee deegaanka Ceel Qoryaale ee hoostage degmada Jalalaqsi ee gobolka Hiiraan, oo haatan qeyb ka ah dagaallada khawaarijta dalka looga saarayo, waxaana uu ku wareejiyay laba neef oo geel ah iyo deeq kala duwan.
Goobta lagu wareejinayay deeqdaan geele ah, waxaa ku sugnaa Xildhibaan Maalik Cabdalla oo ka tirsan golaha shacabka Baarlamaanka Soomaaliya, Guddoomiyaha degmada Jalalaqsi Nuur Dheere, Agaasimaha guud ee Wasaaradda Gargaarka Hirshabelle iyo saraakisha ciidamada degaanka.
Guddoomiyaha Hay’adda SoDMA Maxamuud Macallin Cabdulle oo goob fagaaro kula hadlay boqolaal ciidamada deegaanka ayaa ku dhiirigaliyay dagaalkaan oo ah mid xaq ah, waxaana uu sheegay in mar walba ay garab taaganyahay Hay\addu.
Xildhibaan Maalik Cabdalla oo ka tirsan BFS ayaa sheegay in uu Hay’adda SoDMA iyo guddoomiyaheeda uu uga mahadcelinayo sida uu marwalba dadka deegaanka Hiiraan u garab taaganyahay.
